İtaliya millisinin hücumçusu Moise Kin "Fiorentina" ilə müqaviləsini uzadıb.

Matc.az xəbər verir ki, bu barədə Florensiya klubunun mətbuat xidməti məlumat yayıb.

Yeni müqavilə dörd il müddətinə - 2029-cu ilin yayına qədər nəzərdə tutulub. Əvvəlki müqavilədə 52 milyon avro məbləğində maddə var idi, indi təzminatın məbləği xeyli artıb.

Beləliklə, "Fiorentina" yaxın gələcəkdə Kinin mümkün itkisindən özünü sığortalayıb. Bu yay hücumçu ilə Səudiyyə Ərəbistanı klubları maraqlanırdı.

Qeyd edək ki, 2024/25 mövsümündə Kin A Seriyasında 32 matçda 19 qol vuraraq çempionatın ikinci bombardiri olub. "Transfermarkt" hazırda 25 yaşlı hücumçunun dəyərini 50 milyon avro qiymətləndirir. Forvard karyerası ərzində İtaliya millisində 21 oyun keçirib, 7 qol vurub.