İngiltərə Futbol Assosiasiyasının rəhbəri və Beynəlxalq Futbol Federasiyasının (FİFА) vitse-prezidenti Debbi Hyuitt ABŞ millisinin hücumçusu Folarin Balonqunun dünya çempionatındakı diskvalifikasiyasının ləğv edilməsi ilə bağlı Canni İnfantinodan izahat tələb edib.

Matc.az xəbər verir ki, bu barədə BBC yayım korporasiyası məlumat yayıb.

Bildirilir ki, FİFA rəhbəri İnfantino oktyabrın 15-də keçiriləcək FİFA şurasının növbəti iclasına qədər yazılı cavab təqdim etməlidir.

Həmçinin Hyuitt İnfantinodan dünya çempionatının keçirilmə hüquqlarının bir hissəsinin satışına dair planı ilə bağlı bütün sənədləri açıqlamasını xahiş edib. FİFA-nın baş katibi Mattias Qrafströmə də göndərilən məktubda dünya futbolunun idarəedici orqanında səmərəsiz idarəetmə və korporativ mədəniyyətin məhv edilməsi ilə bağlı ittihamlar yer alıb.

İyulda məlum olub ki, İnfantino təşkilatın əsas kişi və qadın yarışlarına nəzarət edəcək şirkət yaratmaq istəyir. Onun fikrincə, "FIFA Forward Enterprise"ın yaradılması FİFA-ya üzv assosiasiyaların gəlirlərini artıracaq və bütün dünyada futbolun inkişafına töhfə verəcək. Beynəlxalq Futbol Federasiyasından bildirilib ki, bu sxem 4,2 milyard dollar cəlb edə bilərdi. Təşəbbüs funksionerlər, federasiyalar və digər təşkilatlar tərəfindən kütləvi şəkildə tənqid və ittiham olunub.

Xüsusilə İnfantinonun təklifini Avropa Futbol Assosiasiyaları İttifaqı (UEFA), Şimali, Mərkəzi Amerika və Karib hövzəsi Ölkələrinin Futbol Konfederasiyası (KONKAKAF), Asiya Futbol Konfederasiyası (AFC) və Cənubi Amerika Futbol Konfederasiyası (KONMEBOL) rədd edib. Sonradan Afrika Futbol Konfederasiyası, Argentina Futbol Assosiasiyası və bir sıra digər milli federasiyalar İnfantinoya dəstək nümayiş etdiriblər.

Xatırladaq ki, Balonqun dünya çempionatının 1/16 finalında Bosniya və Herseqovina komandası ilə matçda (2:0) müdafiəçi Tarik Muxaremoviçə qarşı qayda pozuntusuna görə qırmızı vərəqə alıb. Amerikalı rəqibinin ayağına arxadan butsla zərbə endirib. İyulun 5-də FİFA-nın intizam komitəsi Balonqunun diskvalifikasiyasını dayandırıb və hücumçu belçikalılara qarşı 1/8 final oyununda (1:4) iştirak edə bilib. Jurnalist Ben Ceykobs daha sonra bildirib ki, FİFA bu qərarı təşkilat rəhbəri Canni İnfantinoya Ağ Evdən zəng gəldikdən sonra qəbul edib. ABŞ prezidenti Donald Tramp bu məsələ ilə bağlı İnfantinoya zəng etdiyini və futbolçunun diskvalifikasiya qərarına yenidən baxılmasını xahiş etdiyini təsdiqləyib.

İnfantinonun 56 yaşı var, o, 2016-cı ilin fevralında keçirilən növbədənkənar konqresdə FİFA rəhbəri seçilib. Sonradan o, alternativsiz əsasda iki dəfə yenidən seçilib. FİFA rəhbərinin növbəti seçkiləri 2027-ci ilin martında keçiriləcək.