Londonun "Arsenal" klubunun rəhbərliyi ötən mövsümdəki rekord gəlirlərinə baxmayaraq, ştatın 60 əməkdaş ixtisar edilməsi variantını nəzərdən keçirir.

Matc.az xəbər verir ki, bu barədə "The Athletic" idman nəşri məlumat yayıb.

Bildirilir ki, ixtisarlar klubun bir sıra bölmələrini əhatə edəcək. Kişi və qadın komandalarının məşqçiləri, klubun ictimaiyyətlə əlaqələr şöbəsi, "Arsenal Fondu" xeyriyyə təşkilatı, təhlükəsizlik xidmətinin heyəti və qadın strukturu ilə məşğul olan əməkdaşlar isə istisna təşkil edəcəklər. Bununla belə, qeyd olunur ki, bu qərar hələ yekun olaraq qəbul edilməyib və dəyişikliyə məruz qala bilər.

Qeyd edək ki, 2025/26 mövsümünün yekunlarına görə "topçular" 22 ildən sonra ilk dəfə daxili çempionatın qalibi olublar və Çempionlar Liqasının finalına qədər yüksəliblər. Onlar həlledici matçda "PSJ"yə uduzublar (1:1 – penaltilərlə 3:4). Belə bir mövsümdən sonra klub zərər üzrə demək olar ki, sıfır balansa yaxınlaşıb – 1,4 milyon funt-sterlinq (təxminən 1 657 537 avro). Eyni zamanda, "Arsenal" mövsüm ərzində 691 milyon funt-sterlinq (təxminən 818,11 milyon avro) qazanaraq rekord gəlir göstəricisinə nail olub.

Klub əməkdaşlarının işdən çıxarılması ilə bağlı oxşar təcrübə "Arsenal"da artıq koronavirus pandemiyası dövründə, 2020-ci ilin avqustunda da sınaqdan keçirilmişdi. Həmin vaxt 55 əməkdaş işdən azad edilmişdi. Xatırladaq ki, London qrandı bu yaxınlarda komandanın baş məşqçisi Mikel Arteta ilə müqavilənin müddətini uzadıb.