Qadın voleybolçular arasında Avropa çempionatı davam edir. Matc.az xəbər verir ki, ilk dəfə 24 komandanın iştirakı ilə keçirilən və tarixdə birinci dəfə 4 ölkədə təşkil olunan yarışda Azərbaycan millisi 4-cü görüşünə çıxıb.

Oyunları Macarıstanda keçirilən C qrupunda qüvvəsini sınayan Covanni Kapraranın yetirmələri bu gün Estoniya ilə üz-üzə gəlib. İlk 3 turda 5 xal toplayan millimiz hələ də xalsız qalan autsayder Estoniya qarşısında aşkar favorit idi. Amma voleybolçularımız tay-brekə qədər uzanan bu görüşdən çətin qələbə ilə ayrılıblar.

Bu qələbə sayəsində Azərbaycan yığması son turun nəticəsindən asılı olmayaraq, qrupda ilk dördlüyə düşməyi, dolayısı ilə pley-offa vəsiqəni təmin edib.

Qrupun digər görüşündə Xorvatiya ilə Macarıstan qarşılaşıb. Xorvatlar bu oyundan qələbə ilə ayrılıblar - 3:0.

Avropa çempionatı

Qrup mərhələsi, IV tur
28 avqust

Azərbaycan - Estoniya - 3:2 (25:20, 18:25, 25:22, 22:25, 15:11)

Qeyd edək ki, qrup mərhələsində ilk 4 yeri tutacaq komandalar 1/8 finala vəsiqə qazanacaq. çempionatda ilk 7 yerin sahibləri Avropa Olimpiya Təsnifat Turnirinə vəsiqə əldə edəcək. Yarışın qalibi isə Tokio-2020 Yay Olimpiya Oyunlarına lisenziya qazanacaq.