Bu gün UEFA Konfrans Liqasında pley-off mərhələsinin püşkü atılacaq.

Matc.az xəbər verir ki, qitənin üçüncü dərəcəli klub turnirində ölkəmizi təmsil edən "Qarabağ"ın pley-offdakı potensial rəqibləri bəlli olacaq.

Bildirilir ki, Bakı vaxtı ilə saat 16:00-da başlayacaq tədbirdən öncə komandalar və cütlər qruplara bölünüb.

Ağdam təmsilçisinin Ukraynanın "Dinamo" (Kiyev) klubu ilə III təsnifat mərhələsindəki duelinin qalibi püşkatmada 4-cü qrupda yer alıb. Bu cütdə mərhələ keçən tərəf 4 mümkün rəqibdən biri ilə qarşılaşacaq.

Həmin potensial rəqiblər "Xetafe" (İspaniya), "Tvente" (Niderland) – "Dunayska Streda" (Slovakiya) cütünün qalibi, "Beytar" (İsrail) – "Austriya" (Avstriya) cütünün qalibi, "Makkabi" (Təl-Əviv, İsrail) – ÇSKA (Sofiya, Bolqarıstan) cütünün məğlubudur.

Qeyd edək ki, III təsnifat mərhələsinin oyunları avqustun 6-da və 13-də, pley-off mərhələsinin qarşılaşmaları isə avqustun 20-də və 27-də keçiriləcək.