03 Noyabr 2026, 17:12
FUTBOL

UEFA Çempionlar Liqasının liqa mərhələsinin IV turunun bütün qarşılaşmaları İspaniyanın “Tenerife” klubunun futbolçusu Xesus de Migelin xatirəsinə bir dəqiqəlik sükutla başlayacaq. Matc.az xəbər verir ki, bu barədə UEFA-nın rəsmi saytı məlumat yayıb.
 
30 yaşlı hücumçu İspaniya “Segunda Division”unun XII turunda “FC Andorra”ya qarşı keçirilən matç zamanı ağır hadisə ilə üzləşib. Görüş 2:2 hesabı ilə davam edərkən De Migel rəqib komandanın qapıçısı Xesus Ovono ilə toqquşub. Toqquşma zamanı sinə nahiyəsindən zərbə alan futbolçunun ürəyi dayanıb.
 
Hadisədən dərhal sonra De Migel xəstəxanaya çatdırılıb və reanimasiya şöbəsinə yerləşdirilib. Həkimlərin səylərinə baxmayaraq, onun həyatını xilas etmək mümkün olmayıb. “Tenerife” klubu futbolçunun noyabrın 3-də səhər saatlarında vəfat etdiyini rəsmən açıqlayıb.
 
UEFA prezidenti Aleksander Çeferin də mərhum futbolçunun vəfatı ilə əlaqədar ailəsinə, yaxınlarına və klubun azarkeşlərinə başsağlığı verib. Avropa futbol qurumunun rəhbəri bu ağır itkinin futbol ictimaiyyəti üçün böyük kədər olduğunu bildirib.
 
Bundan əlavə, UEFA Avropa Liqası və UEFA Konfrans Liqasının bu həftə keçiriləcək qarşılaşmaları da Xesus de Migelin xatirəsinə bir dəqiqəlik sükutla başlayacaq.
 
 
 
 
 

XƏBƏRİ PAYLAŞ
  • gplus
  • pinterest