"Qərarların konstruktiv müzakirəsi həmişə futbolun bir hissəsi olacaq"

Baş hakim və FİFA Hakimlər Komitəsinin sədri Pyerluici Kollina 2026-cı il dünya çempionatında ədalət təmsilçilərinin işi ilə bağlı şərh verib.

Matc.az xəbər verir ki, bu barədə FİFA-nın rəsmi saytı məlumat yayıb.

Bildirilir ki, komitə sədri turnirin gedişatını dəyərləndirib:

"1/16 final matçlar başa çatdı. Hazırda dünya çempionatında 96 oyun keçirilib. Qətərdə baş tutan 2022-ci il dünya çempionatındakından 50 faiz çox oyun keçirmişik və qarşıda daha 8 vacib qarşılaşma var.

Ümumilikdə razıyıq. Lakin qısa müddətdə bu qədər çox oyunun keçirilməsini nəzərə alsaq, bəzi şeylərin gözlənildiyi kimi getməməsi təbiidir. Belə hallarda hakimlər növbəti matça tam hazır olmaq üçün daha çox çalışmağa hazırdırlar.

Qərarların konstruktiv müzakirəsi həmişə futbolun bir hissəsi olacaq, lakin əsassız ittihamların idmanımızda yeri yoxdur. Heç kim dünya çempionatı oyunlarının hakimlərinin dürüstlüyünü şübhə altına ala bilməz. Bu baş verdikdə, onlara və ailələrinə qarşı təhdidlərə yol açan reaksiyalar doğura bilər. Bu isə səhvdir.

Eyni şəkildə, heç kim iddia edə bilməz ki, FİFA-nın hakimlik sisteminə kiminsə, hətta FİFA prezidenti Canni İnfantinonun təsiri ola bilər. O, tam müstəqil şəkildə işləməyimiz üçün bizə etibar edərək həmişə tam dəstəyini nümayiş etdirib. Hakimlər dürüst qərarlar qəbul edirlər və oyunçularla məşqçilər kimi, hər zaman əllərindən gələnin ən yaxşısını etməyə çalışırlar".