2026-cı il dünya çempionatında mübarizə aparan Cənubi Koreya milli komandası mətbuat nümayəndələri ilə bütün əlaqələrini kəsib.

Matc.az xəbər verir ki, bu barədə "ESPN" telekanalı məlumat yayıb.

Asiya təmsilçisinin bu addımı atmasına açıq məşq zamanı yaşanan rüsvayçı hadisə səbəb olub. Belə ki, meydandakı mikrofonlardan biri təsadüfən işlək vəziyyətdə qalıb və jurnalistlərin öz aralarında komandanın kapitanı Son Hınq Min barəsində danışdıqları qeyri-etik şərhləri qeydə alıb. Müxbirlər ulduz futbolçunun zədə səbəbindən qrupdan ayrı məşq etməsini ələ salaraq, onun vaxtilə məcburi hərbi xidmətdən azad edilməsi məsələsini qərəzli şəkildə müzakirə ediblər.

Səs yazısı ictimaiyyətə sızdıqdan sonra Son Hınq Min medianın qarşısına çıxmaqdan imtina edib, Cənubi Koreya Futbol Federasiyası isə planlaşdırılan bütün müsahibələri qeyri-müəyyən müddətə ləğv edib. Yaranan gərginliyə görə nümayəndə heyətinin mətbuat xidmətinin rəhbəri məsuliyyəti öz üzərinə götürərək vəzifəsindən istefa verib.

Xatırladaq ki, Cənubi Koreya millisi mundialın açılış matçında Çexiyanı 2:1 hesabı ilə məğlub edib. Onlar qrup mərhələsinin növbəti oyunlarında Meksika və Cənubi Afrika Respublikası ilə qarşılaşacaqlar.