Əvəzetmə vaxtı oyunçuya meydanı tərk etmək üçün maksimum 10 saniyə vaxt veriləcək.

FİFA 2026-cı il dünya çempionatında yeni qaydalar tədbiq etməyi planlaşdırır.

Matc.az xəbər verir ki, bu barədə məlumatı jurnalist Qaston Edoul paylaşıb.

Bildirilir ki, əvəzetmə vaxtı oyunçuya meydanı tərk etmək üçün maksimum 10 saniyə vaxt veriləcək. Əgər futbolçu gecikərsə, əvəzetmə 1 dəqiqə təxirə salınacaq və komanda müvəqqəti olaraq bir nəfər azlıqda qalmalı olacaq.

Topun yan xətdən daxil edilməsi və qapıya vurulması üçün 5 saniyəlik taymer tətbiq olunacaq. Bu taymeri keçmək topa sahib olmağın itirilməsinə səbəb olacaq.

Meydanda tibbi müalicə alan oyunçu, zədəsi kartla cəzalandırıla bilən qayda pozuntusundan qaynaqlanmadığı təqdirdə, meydanı tərk etməli və geri qayıtmazdan əvvəl 1 dəqiqə gözləməlidir.

VAR qırmızı vərəqə ilə nəticələnən ikinci sarı vərəqələri, eləcə də səhvən verilən künc zərbələrini nəzərdən keçirə biləcək.

Həmçinin, yalnız kapitanın izahat istəmək üçün hakimə müraciət edə biləcəyi qaydasını gücləndirmək planları da var. Digər oyunçulara sarı vərəqə göstərilə bilər.

Qeyd edək ki, 2026-cı il dünya çempionatı üç ölkədə - ABŞ, Kanada və Meksikada keçiriləcək.