FİFA prezidenti Canni İnfantino İsveçrənin Davos şəhərində keçirilən Dünya İqtisadi Forumunda çıxış edib.

Matc.az xəbər verir ki, o, 48 komandanın iştirak edəcəyi 2026-cı il dünya çempionatı üçün rekord göstəricilər təqdim edib.

"Bu, dünyanın bütün komandalarının təxminən dörddə biri olan 48 komandanın iştirak edəcəyi ilk dünya çempionatı olacaq. Üç ölkədəki 16 möhtəşəm stadionda 104 oyun oynanılacaq. Stadionlarda təxminən 7 milyon tamaşaçı, dünyada isə televiziyada izləyən təxminən 6 milyard insan olacaq. Oyunları izləyən amerikalılar üçün bu, bir ayda 104 Superkuboku izləmək kimidir.

Bilet satışının ilk mərhələsini dörd həftə əvvəl açdıq və 500 milyondan çox müraciət aldıq. Dünya çempionatlarının 100 illik tarixində FİFA təxminən 50 milyon bilet satıb. Burada isə dörd həftə ərzində 1000 illik dünya çempionatları tarixinə bərabər müraciət aldıq. Bu, insanların orada olmaq, səyahət etmək və birlikdə olmaq istədiklərini göstərir", - İnfantino deyib.

Qeyd edək ki, 2026-cı il dünya çempionatı 11 iyun - 19 iyul tarixlərində üç ölkədə - ABŞ, Kanada və Meksikada keçiriləcək.