14 Yanvar 2023, 11:43

Almaniyanın "Auqsburq" klubu heyətini yeni futbolçularla gücləndirib. Matc.az xəbər verir ki, Bundesliqa təmsilçisi xorvatiyalı hücumçu Dion Belyo və belçikalı yarımmüdafiəçi Arne Engelsi heyətinə qatıb.
 
Bu barədə klubun rəsmi saytı məlumat yayıb. Onların hər ikisi ilə 2027-ci ilin 30 iyununa kimi müqavilə imzalanıb. Auqsburqlular "Brügge"dən transfer olunan 19 yaşlı Engelsə görə cəmi 100 min avro ödəyiblərsə, "Osiyek"dən gələn Belyonun transferinə görə 3 milyon avrodan keçiblər.
 
 
Engels "Brügge"nin yetirməsidir. 2020-ci ildən bu klubun əsas komandasında forma geyinən futbolçu, 35 oyuna 3 qol vurub. Yarımmüdafiəçi Belçikanın U-19 yığmasında da forma geyinir.
 
Belyo isə peşəkar karyerasına yetirməsi olduğu "çibaliya"da başlayıb. O, 2019-cu ilin yayında məhz bu klubdan "Osiyek"ə transfer olunub. 2021/22 mövsümünü "İstra"da icarədə keçirən futbolçu, burada 37 oyuna 20 qol vurub. 20 yaşlı forvardın "Osiyek" karyerası isə 35 oyun, 10 qol və 3 məhsuldar ötürmədən ibarətdir. Gənc futbolçu hazırda Xorvatiyanın U-21 yığmasına da dəvət alır.
 
"Auqsburq" müdafiəçisi Rafael Frambergeri isə "Sandhauzen"ə icarəyə verib. Almaniyadan olan 27 yaşlı futbolçunun bu mövsümün sonuna kimi aşağı liqa klubunda forma geyinəcəyi açıqlanıb.
 
Turan

XƏBƏRİ PAYLAŞ
  • gplus
  • pinterest