"Qarabağ"ın futbolçusu Qara Qarayev Topaz Premyer Liqasının IX turunda "Neftçi"yə 1:3 hesablı məğlubiyyətdən sonra jurnalistlərin suallarını cavablandırıb. Matç.az saytı xəbər verir ki, yarımmüdafiəçi oyun və komandası barədə danışıb.

-  1:3 hesabı ilə uduzduz. Məğlubiyyətə səbəb nə oldu?

-  Xüsusi səbəb demək istəməzdim. çalışdıq ki, yaxşı oynayaq. İlk hissədə də, fasilədən sonra da bizim imkanlarımız daha çox oldu. Oyuna nəzarət etdik, ancaq daha vacib olan qoldu. Bunu da rəqib vurdu. 3 tutarlı əks-hücumdan istifadə etdilər. Danışacaq çox şey yoxdu. Düşünürəm ki, bugünkü atmosfer futbolumuz adına çox yaxşıdı. Hər iki komandanın azarkeşlərinə təşəkkür düşür. Oyunun belə maraqlı alınmasında onların da rolu böyük oldu.

-  Topu rəqib cərimə meydançasına qədər aparsaz da, bundan sonrasını gətirə bilmirdiz...

-  İstər çempionat olsun, istər avrokuboklar – son vaxtlar oyunlarda nəzarət edən, qapıya daha çox zərbə endirən bizik. Düşünmürəm ki, az imkan yaradırıq. Bu gün də elə ilk hissədə Emeqaranın qaçırdığı epizod var idi, Slavçevin zərbəsi dirəyə dəydi və s. Sadəcə qol vurmuruq deyə, bunlar nəzərə çarpmır.

-  "Neftçi"nin əks-hücumlarda oynayacağı gözlənilən idi. Ancaq sanki buna hazır deyildiz...

-  Rəqibin qolları zamanı ani çaşqınlıqlar olmadı. Düşünülmüş şəkildə belə oynayırdılar. ümidlərini əks-hücumlara bağlamışdılar. İstəklərinə də çatdılar. İlk hissədəki qol epizodlarında futbolçularımız 1-2 addım geri və ya irəli olsaydı, qarşısını ala bilərdik. Bunu gözləyirdik. çalışırdıq ki, qarşısını alaq, onlar da daha yaxşı hücum etmək istəyirdilər.

-  Yakub Jezniçak start heyətdə idi və çox zəif oyun keçirdi...

-  O, çox çalışqandı. 32 yaşı olmasına baxmayaraq, məşqlərdə də çox çalışır. Ola bilər ki, hansısa oyunu zəif keçirsin. Ancaq bu, o demək deyil ki, zəifləyib, yaxud fiziki formasında problem var. Ondan örnək götürüləsi şeylər çoxdu. Əsas oyunçularımızdan biridi.

-  Razısan ki, bu il çempionluq yarışı daha çətin keçəcək?

-  "Qarabağ" bu il 3 fərqli yarışda mübarizə aparır. Bu da, təbii ki, hansısa oyunlara təsir edir. Bəhanə deyil, amma bəzən həqiqətən də, turnirləri bölüşdürmək çətin olur. 3 gündən sonra yenə oyunumuz var. Həm bu problem, həm də avrokubok və çempionatda bəzi oyunlarda istənilən nəticələrin olmaması motivasiya cəhətdən çətinlik yaradır. Doğru yoldayıq.  Nəticə bu gün ola bilər ki, olmasın, sabah da olmasın, amma biz əminik ki, düzgün istiqamətdəyik.

-  "Səbail"lə texniki məğlubiyyəti çıxsaq, komanda 2 oyundu uduzur. Bunu eniş adlandırmaq olar?

-  "Səbail"lə oyunun ədalətli nəticəsi odu ki, qələbə qazanmışıq. Sadəcə, protokoldakı bir cümləyə görə uduzduq. "Vorskla" ilə avrokubok oyununda da üstün olan biz idik. Düşünmürəm ki, son vaxtlardakı nəticələrin enişdi. çempionatda ikinciyik, Avropa Liqasında qrup oynayırıq. Bu, "Qarabağ"ın adına eniş deyil. İndi ikinci yerdə olmağımız bizi narahat etmir. Yetərincə vaxtımız var. Qalibiyyətlər hələ qabaqdadı. Azarkeşlərimiz də yanımızdadı. Düşünürəm ki, "Qarabağ" adı daha yüksəklərdə olacaq.

 

XƏBƏRİ PAYLAŞ
  • gplus
  • pinterest