Futzal üzrə Çempionlar Liqasının ilkin mərhələsində Yunanıstan AEK-i ilə Azərbaycan çempionu "Araz" arasında keçiriləcək oyunun vaxtı dəyişdirilib.
 
Matc.az xəbər verir ki, bu barədə Naxçıvan təmsilçisinin idman direktoru Marat Salyanski məlumat verib.
 
Klub rəsmisinin sözlərinə görə, qarşılaşma daha əvvəl nəzərdə tutulduğu kimi noyabrın 29-da deyil, bir gün tez baş tutacaq. Salyanski bu addımın qarşı tərəfin istəyilə atıldığını bildirib: "Pandemiya ilə bağlı Yunanıstandakı vəziyyətə görə xahiş etdilər ki, oyun bir gün tez keçirilsin. Hətta vaxtı da dəyişdirdilər. Matç əvvəlcə 23:00-da başlamalı idi. Son qərara əsasən, görüşün start fiti Bakı vaxtı ilə saat 16:30-da veriləcək".
 
İdman direktoru səfər proqramının hələ bəlli olmadığını söyləyib: "Komanda üzvləri noyabrın 25-dən testdən keçəcəklər. Bundan sonra yekun heyət və səfər planı məlum olacaq". (Report)
 
Yeri gəlmişkən qeyd edək ki, AEK-lə "Araz" arasında keçiriləcək oyun öncəsi koronavirusla bağlı təhlükəsizlik tədbirləri gücləndiriləcək. Yunanıstan mətbuatının məlumatına görə, Afinadakı "Dais Sports Hall"da baş tutacaq matçda sosial məsafənin qorunması üçün arenada 4 giriş zonası fəaliyyət göstərəcək. Azarkeşsiz oynanılacaq qarşılaşmada meydandakı oyunçulardan başqa, hamının tibbi maska taxması məcburi olacaq.
 
Qeyd edək ki, cütün qalibi bir oyunla müəyyənləşəcək.
 
 
 
 
 
 

XƏBƏRİ PAYLAŞ
  • gplus
  • pinterest