"Hazırlığa yanvarın 4-də Bakıda başladıq. Artıq iki gündü Türkiyədə məşq edirik. Toplanışın ilk günündən bütün futbolçular səylə çalışır, istəklidilər. Məşqlərə başladığımız vaxtdan yaxşı hazırlıq keçirik. Komandada yüksək atmosfer var".

Mövsümün ikinci yarısının hazırlıqlarını Türkiyədə davam etdirən "Qəbələ" Antalya toplanışının ilk iki gününü başa vurub. Matc.az xəbər verir ki, "qırmızı-qaralar"ın xorvatiyalı müdafiəçisi İvitsa Juniç hazırlıq prosesini klubun rəsmi saytına açıqlamasında dəyərləndirib.

O, məşqlərdə səylə çalışdıqlarını söyləyib: "Hazırlığa yanvarın 4-də Bakıda başladıq. Artıq iki gündü Türkiyədə məşq edirik. Toplanışın ilk günündən bütün futbolçular səylə çalışır, istəklidilər. Məşqlərə başladığımız vaxtdan yaxşı hazırlıq keçirik. Komandada yüksək atmosfer var. Bunun da hazırlıq prosesinə müsbət təsiri böyükdü. Antalyadakı məşq qrafikimiz daha sıxdı. Mövsümün ikinci yarısına tam hazır olmaq üçün toplanış çərçivəsində həm fiziki, həm də texniki-taktiki hazırlıq üzərində çalışacağıq".

Juniç toplanış çərçivəsində baş tutacaq yoxlama oyunlarının vacibliyinə də toxunub: "Bakıda gerçəkləşən hazırlığı MOİK-lə qarşılaşma ilə başa vurduq. 4:0 hesablı qələbə səfərə yüksək əhval-ruhiyyə ilə çıxmağımıza səbəb oldu. Türkiyədə daha 4 matça çıxacağıq. Məşqlərlə yanaşı, bu qarşılaşmaların da faydası böyükdü. Hazırlıq prosesində üzərində çalışdığımız texniki-taktiki elementlərin icrasını oyunda görmək səmərəli olacaq. Bu görüşlərə yaxşı hazırlaşacağıq. Hesab edirəm ki, matçlarda yaxşı oyun nümayiş etdirib, mövsümün ikinci yarısına tam hazır olacağıq".