"Qarabağ"ın vitse-prezidenti Tahir Gözəl Avropa Liqasının qrup mərhələsinin V turunun "Sevilya" ilə oyunundan (0:2) sonra jurnalistlərin suallarını cavablandırıb. Matc.az xəbər verir ki, o, əvvəlcə məğlubiyyəti şərh edib.

- Qarşımızda nəhəng klub var idi. Başa düşürəm, bizimkilər də dəqiq oynamaq istəyirdilər. Birinci hissədə pis deyildik. Amma ikinci hissənin ilk 20 dəqiqəsində çox zəif oynadıq. Sanki inamımızı itirmişdik. Halbuki, mən daha inamlı olacağımızı ehtimal edirdim. Onları qapımıza yaxın buraxmaq olmazdı. Əlbəttə ki, oradan qol vura bilərdilər. üzüldüm. Daha təhlükəli rəqib kimi görünəcəyimizə inanırdım. Bu gün çox passiv idik.

- İlk hissə 0:0 başa çatdıqdan sonra ikinci hissə üçün inamınız artmışdı?
- İkinci hissədə birincidəki kimi oynasaydıq, yaxşı olardı. Məncə, ikinci hissəyə zəif başladıq. Bu gün bəlkə də bərabərlik üçün oynadıq və səhvimiz də bu idi. Ancaq əlbəttə ki, nəhəng kluba qarşı oynadıq. "Qarabağ"ın ifasında gözəl oyun görmədim. Məni məyus edən bu oldu.

- Bir gün öncə demişdiniz ki, qorxaq oyun yox, hücum futbolu göstərməliyik...
- Bəli. Amma arzuma çatmadım. Bu, həqiqətdi. Ancaq istənilən halda, "Sevilya" kimi komandaya 0:2 hesabı ilə uduzmaq normaldı. Amma meydanda xəyalımdakı "Qarabağ"ı görmədim.

- Avropa Liqası artıq sizin üçün bitdi. Necə şərh verəcəksiniz?
- Bəli, bitdi. Biz bu qrupdan çıxmalı idik. Tarixi fürsət var idi. Pis də oynamadıq. APOEL-lə oyunları xatırlayanda insan üzülür. Qrupdan çıxmağa layiq idik. Sadəcə bəxtimiz gətirmədi.

- Sizcə, harda bitdi bu şans, Nikosiyada?
- Mən Sevilyada da ümidli idim. İlk 45 dəqiqədən sonra ikinci hissəyə daha inamlı çıxacağımızı düşündüm. Amma arzuladığımız oyunu oynamadıq.

- Sizcə, bu, indiyə qədərki ən münasib qrup deyildi?
- Bizim üçün tarixi fürsət idi. Ən yaxşı fürsət idi.

- Baş hakim çox fit vermirdi?
- Xeyr, elə şey hiss etmədim. Oyunumuzda qısamüddətli hərəkətlilik oldu. Əgər bunu edə biliriksə, niyə 5 dəqiqə, amma 15 dəqiqə deyil? Onsuz da hesabda geridə idik. Ən azından heç-heçə gözləyirdim. Məncə, 0:1-dən sonra 0:4-ün də fərqi yoxdur. Qurban Qurbanov deyiləm, peşəkar məşqçi də deyiləm. Mən sadəcə, emosional fanatam.

 

XƏBƏRİ PAYLAŞ
  • gplus
  • pinterest