"Portu" və "Fənərbaxça"nın sabiq baş məşqçisi Vitor Pereyraya həbs cəzası verilib. Matc.az xəbər verir ki, Yunanıstan məhkəməsi "Olimpiakos"u çalışdırdığı zaman "Panatinaikos"la matçda azarkeşləri təhqir edərək, böyük qalmaqala səbəb olduğu üçün portuqaliyalı mütəxəssisə 8 aylıq həbs cəzası verib və bu qərarı təxirə salıb.
"Panatianikos" – "Olimpiakos" oyunu meydan sahiblərinin 2:1 hesablı qələbəsiylə başa çatsa da, Vitor Pereyranın səbəb olduğu hadisələrdən sonra "Panatinaikos"un 3 xalı silinib, 100 min avro cərimələnib və komandaya 2 oyun azarkeşsiz oynama cəzası verilmişdi.
2011-2013-cü illərdə "Portu"nu çalışdıran Pereyra 2015-ci ilin yanvarından iyuluna qədər "Olimpiakos"da baş məşqçi olub. Portuqaliyalı mütəxəssis daha sonra "Fənərbaxça", "Münih 1860" kimi komandalarda çalışıb.
Qeyd edək ki, 51 yaşlı Pereyra hazırda çinin "Şanxay SİPQ" klubunda işləyir.