"Futbolçuları təbrik edirəm. Hər matç bizim üçün vacibdi. Oyunçular nizam-intizamı saxladılar. Rəqibə və baş məşqçiləri Sənan Qurbanova uğurlar arzulayıram. Ola bilər ki, onlarda hər hansı bir dəyişikliklər olub". Matc.az xəbər verir ki, bu fikirləri "Qarabağ"ın baş məşqçisi Qurban Qurbanov Premyer Liqanın II turunda evdə "Qəbələ"ni 3:0 hesabı ilə məğlub etdikləri oyundan sonra mətbuat konfransında deyib. 

47 yaşlı mütəxəssis futbolçuların çıxışları barədə danışıb: "Araz Abdullayev görüşdə həvəssiz deyildi.  Maqaye Qeyenin yaxşı keyfiyyətlərini bu gün gördüm. Hazırda formasından uzaqdı.  Oyunçular bir-birini yaxşı başa düşdülər. Qarşıda daha da yaxşı Maqaye Qeye görə bilərik". 

Təcrübəli məşqçi zədəli oyunların durumları barədə də açıqlama verib: "Bədavi Hüseynov fərdi məşqləri gücləndirib. Hələ ki, hazır deyil və bir az düzəlib. O, iki dəfə ardıcıl zədə aldı. Buna görə də diqqətli olmalıyıq. Yığmanın fasiləsindən sonra onu meydanda görə bilərik. Filib Ozobiç isə 2 ay olmayacaq. İndi Xorvatiyadadı. Bir neçə həkimlə məsləhətləşdik. Zədəsi ağırdı.  Düşünürəm ki, əməliyyat olunmayacaq və bir aydan sonra fərdi məşqlərə başla bilər".

Qurbanov yeni oyunçu axtarışında olduqlarını sözlərinə əlavə edib: "Biz transfer axtarışındayıq. Yarımmüdafiəçi istəyirik. Avropa Liqasının qrupuna düşsək də, düşməsək də orta xəttə oyunçu istəyirik".

Məşqçi gənc oyunçu İsmayıl İbrahimli haqqında da xoş fikirlər söyləyib: "Mənim onun barədə fikrim pozitivdi. Oyun üslubumuza tam uyğundu. Amma iki oyunda meydanda olmaq tam hazır olmaq demək deyil. Daha çox işləməlidi. İsmayılın futbol mentaliteti yaxşıdı. Bizim kollektivə uyğun futbolçudu".